Home Comment De Wee2050 geet mat der ADR – An dass mir elo kee méi mat “politescher Mëtt” kënnt!

De Wee2050 geet mat der ADR – An dass mir elo kee méi mat “politescher Mëtt” kënnt!

by Christophe Froehling

Gëschter huet de politesche Grupp Nee2015 / Wee2050 seng Zesummenaarbecht mat der ADR fir d’Chamberwahlen 2018 ugekënnegt. Wien hätt et gewonnert?

Et si just nach e puer Méint bis bei d’Chamberwahlen am Oktober. An och wa sech d’Wahlkampfstëmmung nach net sou richteg astelle wëll, preparéiert ee sech bei den Nationalkonservative schonn intensiv op e méigleche Comeback. Nodeems d’ADR an deene leschten dräi Wahlperiode kontinuéierlech u Mandater verluer huet, wëll een elo verstäerkt an d’Offensiv goen. Dowéinst deet sech d’ADR elo mam Grupp Nee2015 / Wee2050 zesummen. D’Partei offréiert dem Fred Keup, souwéi anere Membere vum Grupp, Plazen op hirer Kandidatelëscht. Iwwerrascht iech dat? Mech op jidde Fall net.

Nee, fir mech war vu vir era kloer, dass der Gruppéierung hire schäinhellege Kanon vun der “politescher Mëtt” näischt anescht ass wéi e mofe Rideau, hannert deem sech déi eigentlech Sympathie mat enger xenophober, nationalkonservativer an domat rietser Ideologie verstoppt. Spéitstens mat dëser Bekenntnis zur ADR ass definitiv gekläert, dass dem Fred Keup säi Wee2050 däitlech no riets zitt an eben net an der Mëtt verleeft – weder politesch, nach gesellschaftlech.

Dës Nouvelle ass awer och eng Gefor fir den zukünftege politeschen Debat. D’Membere vum Grupp hunn dacks genuch ënner Beweis gestallt, dass si wéineg Wäert op fundéiert Fakte leeën a léiwer mat hirer pseudowëssenschaftlecher Argumentatioun Populismus bedreiwen. Si übe sech doran, Tatsaachen esou laang ze verdréinen, bis se hinnen an de Krom passen. Mat Hëllef vu verfälschte Statistiken a falsche Behaaptunge gëtt geziilt Stëmmung gemaach a Panik verbreet. Dat gouf scho vu ville Säiten ugeklot an diskutéiert.

Mat dëser Vereenegung gëtt versicht, eng verdréint Wourecht an eng bedenklech Ideologie zu Lëtzebuerg salonfäeg ze maachen. Dowéinst gëlt et grad elo ëmsou méi, dës Entwécklung um politeschen Niveau mat engem kriteschen A z’observéieren.

You may also like

Leave a Comment

This site uses Akismet to reduce spam. Learn how your comment data is processed.