Home Comment Wahlen 2018: Huet d’CSV hir Lektioun wierklech geléiert?

Wahlen 2018: Huet d’CSV hir Lektioun wierklech geléiert?

by Christophe Froehling

Lëtzebuerg huet gewielt an d’Parteielandschaft huet sech staark verännert. Déi etabléiert Parteien zéien doraus hir Conclusiounen, ma huet d’CSV wierklech hir Lektioun geléiert?

De Wieler ass ëmmer fir eng Iwwerraschung gutt. Ganzer siwe Parteien hunn et an d’Chamber gepackt, dovun eng fir déi éischt Kéier an hirer nach jonker politescher Lafbunn. Direkt zwee Sëtz konnten d’Piraten am Parlament fir sech gewannen. Ma och déi Gréng kënne sech iwwert hire Rekordstand freeën. D’Partei schéngt an deene leschte fënnef Joer bewisen ze hunn, dass si duerchaus regierungsfäeg ass a krut dowéinst vum Wieler zolitt de Réck gestäipt. Fir déi Gréng ass kloer: Un hinne féiert kee Wee derlaanscht.

Wärend am Atelier eng Knuppefreed herrscht, leckt ee sech bei den etabléierte Parteien d’Wonnen. D’DP kënnt nach mat engem bloen A dovun, ma d’LSAP muss nawell Plomme loossen. D’Sozialiste weise sech e bëssen erniichtert iwwert dat eegent Wahlresultat, schéngen awer op d’mannst anzegesinn, dass sech eppes an Zukunft ännere muss. Just bei der CSV sinn ech mer net esou sécher, ob de Message wierklech bei jiddferengem ukomm ass.

D’Elefanteronn liwwert, wéi ze erwaarde war, keng gréisser Iwwerraschungen. D’Parteispëtzte verweise geméiss der Konventioun op hir Gremien a wëllen den Ament keng konkret Aussoen treffen. Eben dat üblecht Geplänkel virum Méindeg vun den Entrevuen. Ma lauschtert een dem Claude Wiseler no, fillt ee sech séier un d’Joer 2013 erënnert. Et geséich ee jo an, dass een um nationalen Niveau agebéisst hätt, ma et bléif een nach wie vor déi stäerkst Kraaft. De Fraktiounspresident “erwaart” sech een Ament souguer, dass een onbedéngt mat hinne Gespréicher féiere misst. Wéi e Schutzschëld ginn déi 21 Mandater, déi der geschwächter CSV nach bliwwe sinn, viru sech gehalen. Ob Schuedensbegrenzung, Schock oder Verdrësslechkeet, dat ass um Wahlowend schwéier ofzeliesen.

Eppes ass awer net vun der Hand ze weisen: D’CSV muss endlech erwächen. Well si mer éierlech, et deit sech e kloren Trend un – an zwar no ënnen. Mag sinn, dass 2013 eng ganz besonnesch Ausgangssituatioun bestanen huet, déi et der “Juncker-Partei” net einfach gemaach huet, sech ze behaapten. Un dësem Sonndeg awer, no ëmmerhin fënnef Joer Oppositioun, gëtt et keng Excuse. Bei engem Minus vu gutt 5% um nationalen Niveau an domat deem gréisste Verloscht an der Parteielandschaft, kann een definitiv net vun enger Victoire schwätzen.

À propos Oppositioun: An där Roll konnt sech d’CSV net sou richteg regeneréieren. Et ass och net immens glafwierdeg, an engem Ofschlossbilan ze behaapten, et hätt een alles anescht gemaach, wann een an circa 85% vun de Fäll mat der Regierung d’accord war. Wat se anescht gemaach hätten, dat hu si eis en fin de compte jo och net wierklech verroden. Dee grouss ugekënnegte “Plang fir Lëtzebuerg” ass dunn vill ze spéit komm, an dann och nach just häpperchersweis. An iwwerhaapt: Wann d’CSV elo e Plang huet, géing dat dann net heeschen, si hätt an der Vergaangenheet kee Plang gehat? Nee nee, bei aller Léift, mee esou iwwerzeegt ee keng Wieler. Et schéngt, wéi wann d’Vollekspartei hir Lektioun nach net geléiert hätt.

Et gëtt héich Zäit fir eng intern Erneierung. D’Partei dierf sech virun allem net méi virun hire jonke Membere verschléissen. Natierlech hunn al Huese vill Erfarung. Ma wann der ze vill um Terrain sinn, ginn déi Jonk blockéiert an en iwwerfällege Generatiounswiessel gëtt verhënnert. Nei Gesiichter bréngen nei Iddie mat eran. Gambia mécht et vir: En Taina Bofferding (LSAP) iwwerhëlt am Süden eng etabléiert Lydia Mutsch. Am Osten kéint d’Tess Burton (LSAP) op dem Nicolas Schmit säi Sëtz oprutschen. D’Corinne Cahen (DP) huet hir Kompetenz ënner Beweis gestallt a mat der Kollegin Lydie Polfer opgeschloss. De François Benoy (Déi Gréng) ass mat sengen 33 Joer fir d’éischt an d’Chamber gewielt ginn. A si mer mol éierlech, léif Madame Lulling, dem Urgesteen François Bausch huet dat absolut net geschuet, ganz am Géigendeel. E bësse frësche Wand, wann och e geméissegten, géing och der CSV wierklech net schlecht stoen.

Wéi d’Caroline Mart an deenen onzielege Wahlemissiounen ëmmer nees ervirgehuewen huet: De Wielerwëllen ass heiansdo schwéier ze interpretéieren. Wat d’Wielerwanderung ugeet, wëll ech mech dowéinst net ze no un d’oppe Fënster woen. Et ass awer evident, dass sech d’Wielerschaft nei orientéiert huet. D’Vollek krut demonstréiert, dass een och gutt ouni eng CSV an dësem Land regéiere kann. Op eemol stinn nei Weeër op an alles schéngt méiglech ze sinn. D’Vollekspartei muss sech also ferm um Rimm rappen a sech endlech erneieren, soss kéint sech den Negativtrend vläicht an Zukunft bestätegen.

You may also like

Leave a Comment

This site uses Akismet to reduce spam. Learn how your comment data is processed.