Home LB Wee2050: De leschte Stréihallem

Wee2050: De leschte Stréihallem

by Christophe Froehling

Beim Versuch, d’Opmierksamkeet op sech ze zéien, verrennt sech de Wee2050 ëmmer nees an eng verschäerft Rhetorik. Iwwert e riskant Spill mam Feier, eng bedenklech Entwécklung an Individue mat engem héichflexible Verständnis vu Meenungs- a Konschtfräiheet.

Den Artikel ulauschteren:

 

“Meenungsfräiheet ass eent vun de Grondprinzipie vun Europa. Mir setzen eis dofir an, dass Dir Är Meenung kënnt soen, och wa se aneren net gefält.” Mat dëse Wierder huet de Fred Keup vu Wee2050 nach virun e puer Woche grouss Reklamm fir d’ADR gemaach. Wat ee sech dëse Message méi laang op der Zong zergoe léisst, wat e méi befriemlech kléngt, kënnt en dach vum Gesiicht vun engem Grupp, dee fläisseg blockéiert a läscht, wat net an dat eegent Narrativ passt. Wann dann och nach grad d’Kommentarfunktioun ënnert eben dësem Wahlspot mam Titel “Fir d’Meenungsfräiheet an e fräien Internet” gespaart ass, dann ass dat zimlech peinlech. Et ass kontradiktoresch, jo riicht eraus heuchleresch, Journalisten, Fuerscher, Privatpersounen oder Membere vun aneren Organisatiounen ëffentlech unzegräifen, well se eng perséinlech Meenung vu sech ginn, wärend een am nächsten Abléck fuerdert, dass dem Bierger nees méi nogelauschtert soll ginn. Ma esou richteg culottéiert ass et awer dann, dass de Fred Keup gläichzäiteg eng Geriichtsaffär lafen huet, an där hien engem Kënschtler ausgerechent dat Recht op fräi Meenungsäusserung oferkennt, fir dat hie sech am Wahlkampf ausschwätzt. Kuerz gesot: Et loosse sech vill Konnotatioune mat dësem Clip a Verbindung setzen, a keng dovun ass positiv.

Mëttlerweil gouf den Tun Tonnar alias Turnup Tun an der Affär “FCK LXB” bekanntlech fräigesprach, zugonschte vun der Konscht- a Meenungsfräiheet. Ma amplaz dorauser eng Léier ze zéien, sech d’Wonnen ze lecken an einfach Gras iwwert dat Ganzt wuessen ze loossen, sinn direkt zwou vun den dräi Partie-Civillen an Appell gaangen. Dass de Parquet an esou Fäll standardméisseg nozitt, passt dem Fred Keup a sengen Unhänger dobäi tipptopp an de Krom. Esou kann ee sech brav am Hannergrond halen an dat Ganzt esou dréinen, wéi wann d’Appellinitiativ vum Parquet ausgaange wier. Elo wou d’Wahlen eriwwer sinn an d’Thema den normalen Noriichtenzyklus duerchgemaach huet, kéint ee mengen, et géing e bësse méi roueg ginn. Dës Woch si mer enges Bessere beléiert ginn.

Ëmmer nach een drop

D’Kiischt um Kuch huet nämlech net laang op sech waarde gelooss: An engem Pressecommuniqué geheit Wee2050 elo der Stad Lëtzebuerg vir, se géing “Hetzer eng Plattform” ginn, well den Turnup Tun um Virowend vun Nationalfeierdag e Concert an der Stad ginn huet. Säin Optrëtt wier “en Affront géint eis Natioun, géint eist Land [a] géint all seng Awunner, déi dat Land gäeren hunn”. Mat de gewinnte Methode gëtt nees probéiert, eng Gesellschaft, egal wéi geméissegt déi individuell Usiichten och sinn, géint eng Persoun opzestëppelen. Dës Kéier fiert de Grupp ronderëm de Fred Keup dem Rapper net nëmmen iwwert de Mond, wéi sou oft an der Vergaangenheet. Nee, et gëtt him elo och nach ouni Schimmt virgeheit, Hetz ze verbreeden. Am nämlechten Otemzuch recommandéiere si, zukünfteg Optrëtter vum Kënschtler, déi an anere Gemenge geplangt sinn, ofzesoen. E Boykott-Opruff, dee scho bal un Zensur grenzt. Dat alles wuelgemierkt wéinst engem gesellschaftskritesche Lidd, dat de Rietspopulisten net geschmaacht huet. Et stell ee sech mol vir, wat bei eisen däitschen Nopere lass wier, wann eng Annegret Kramp-Karrenbauer YouTube als “Hetzplattform” géing betitelen an en ähnlechen Opruff géint den “Hetzer” Rezo starten, jo vläicht souguer eng Plainte wéinst Beleidegung deposéiere géing!

D’geféierlecht Spill mam Feier

Esou klengbiergerlech, wéi ee sech beim Wee2050 och gäeren inszenéiere wëll – et deit sech eng schläichend Radikaliséierung vum Grupp un. Hu seng Memberen a Sympathisante schonn an der Vergaangenheet gäere mam Feier gespillt, komme se elo ëmmer méi no un d’Flam. Den Toun gëtt wesentlech méi schaarf, et bleift net méi just beim leidege Gepicks géint d’ASTI, Kritiker an d’Regierung. Villméi gëtt eng reegelrecht Hetzjuegd organiséiert. Esou eng Phraseologie bleift net laang ouni Suitten. Wéi WOXX matdeelt, ass et nom Concert an der Stad zum “Eklat” tëscht dem Turnup Tun an Unhänger vum 1. FC Kielen komm. Zwar soll et just bei verbalen Attacke bliwwe sinn, ma d’Police hätt de jonke Kënschtler trotzdem bis bei den Auto begleet.

Dësen opgehëtzte Langage schéngt doriwwer eraus fir verschidde Leit e Gréng-Luucht-Signal duerzestellen, fir op eng onmoosseg affrontéiert Manéier géint den Tun, säi Papp a seng Famill hirzezéien. Esou kann ënnert dem Bäitrag alt nees ongehemmt gestëppelt ginn. Vu Moderatioun säitens vum Wee ass natierlech keng Spuer, wouduerch esou Commentairen net just toleréiert, mee och nach encouragéiert ginn. Hei just eng kleng Auswiel:

 
 

Wa Polemik eleng net méi duer geet

Et ass iwwerdeems kee Geheimnis, dass et schlecht ëm de Wee2050 bestallt ass. D’Interaktiounszuele si scho laang réckleefeg, an et schéngt, wéi wann déi albewäert Methoden net méi esou gutt zéie wéi nach virun engem Joer. Souguer d’Kärtheme Sprooch a Wuesstëm polariséieren net méi genuch, esou dass een ëmmer méi dacks op Reklammen ugewisen ass, fir de Steen un d’Rullen ze bréngen. De Grupp struewelt. Kee Wonner also, dass een no all Stréihallem sicht, fir am Gespréich ze bleiwen.

Wat dëse PR-Stunt virun allem kloer mécht, ass datt all konstruktiven Debat, dee mir eigentlech zu Lëtzebuerg féiere missten, duerch esou populistesch Aktiounen ausgebremst gëtt. Amplaz iwwer wichteg Sujeten ze diskutéieren, musse mir eis reegelméisseg mat konstruéierte Problemer ronderëm schloen, déi eis vun enger handvoll Populiste virun d’Nues geklaakt ginn. Et gëtt héich Zäit, dass mir eis nees op dat Wesentlecht konzentréieren an eis net vun Demagogen d’Debattekultur vergëfte loossen.

You may also like

Leave a Comment

This site uses Akismet to reduce spam. Learn how your comment data is processed.